الصندوق الاســود ( 3 ) ... انتخبوا العرص رئيسا لمصر

--
--

--

الحمد لله رب العالمين … احب اطمن اصدقائى ان انا بخير الان ولم اعد فى حاجة لاجراء عملية جراحية كما ذكرت فى مقالتى السابقة … انا بالفعل اجريت الفحوصات الطبية لما قبل العملية و كلها طلعت كويسة و الحمد لله واتفقت مع الدكتور على المصاريف  … لكن هو لاحظ فى اخر كشف ان فى تحسن ملحوظ فى حالتى … فاخبرنى ان ننتظر 10 ايام كمحاولة اخيرة وانا رحبت بعرضه رغم انى كنت خلاص استعديت نفسيا و ماديا لاجراء الجراحة … وانا كنت عنده من يومين واخبرنى ان حالتى لم تعد فى حاجة لعملية الان وكل اللى محتاجه انى لا اجلس كثيرا و اظبط اكلى وانتظم على العلاج اسبوعين كمان وخلاص ان شاء الله و شكرا لكل اللى سالوا و اللى زارونى فى البيت و دعواتكم … الحمد لله رب العالمين

اللواء عبد الفتاح السيسى وهاشتاج العرص … 26 مارس 2014 … اليوم الذى اعلن فيه عبد الفتاح السيسى اعتزامه الترشح  للرئاسة هو نفس يوم وفاة الفنان احمد زكى … انا بحب السينما جدا ولان كل فيلم هو اساسا سيناريو يعنى كتاب … واذا نظرنا الى اى فيلم جيد فسوف نجده انه مجموعة من الكتب نتيجة لرؤية المخرج واحساس الممثلين … انا بحب احمد زكى و زكى رستم و ال باتشينو و انتونى هوبكنز و تقريبا شاهدت اغلب افلامهم بل ان هناك بعض الافلام التى احفظها كاملة … احمد زكى هو اكتر واحد بكيت يوم وفاته فى حياتى و هو له مقولة عبقرية لما قال ان اللى بيعمله مش تمثيل لانه بيؤدى نص مكتوب لكن اللى بيعمله البشر هو اللى تمثيل … وعلشان كدة يا جماعة الشيخ حازم ابو اسماعيل كان ملهم فى وصفه للواء عبد الفتاح السيسى بالممثل العاطفى … انا لن اناقش الان اذا كان مشاهدة الافلام حلال ام حرام او اذا كان هاشتاج انتخبوا العرص حلال ام حرام لان هذا هو دور الشيوخ الكبار … وانا شخصيا مؤمن ان الافلام حرام والشتيمة حرام طبعا وانا ضد هذا الاسلوب لكن انا هنا باستشهد من خلال قصة فى فيلم وليس مجاهرة بالمعصية … اولا لازم اكون واضح انى متاكد ان الهاشتاج تلقى دعم مالى حتى ينتشرعلى تويتر و فيس بوك … وطبعا الجزيرة نشرته بشكل غير مباشر … وايضا انا اعتقد ان الهاشتاج عملية ثأر من كلام عكاشة ومرتضى منصور و احمد موسى و تلميحاتهم الجنسية عن امير قطر تميم وامه السيدة موزة … لان العداء بين قطر و مصر هو فى الاصل عداء تاريخى بين سوزان و موزة و حمد و مبارك ثم انتقل للسيسى و الامير تميم … لاننا لازم نربط الورق كله والابعاد النفسية للاعبين كلهم حتى نفهم الاحداث … وهذا موضوع يحتاج لمقالة كاملة حتى اشرح الابعاد النفسية بين حكام قطر و حكام مصر و ايضا الابعاد النفسية و الصراعات بين الشاطر و مرسى و بديع و عزت فيما بينهم و ايضا مع غيرهم … من احد اهم اسباب موت انتفاضة 25 يناير هو الصراعات الشخصية و الاحقاد والحسد بين قيادات التيارات الاسلامية … 

لقد ذكرت فى مقالة سابقة انى ممكن اشرح جميع احداث الثورة المصرية و الانقلاب بجميع احداثها من خلال مجموعة افلام الاب الروحى لال باتشينو ... فى الجزء الاول تم اغتيال ابن مارلون براندو واخو ال باتشينو فى الفيلم من عصابة مافيا اخرى انتقاما منهم … فعقدوا اجتماع للمصالحة بين العصابتين بين عصابة تاتاليا و عصابة دون كورليونى وكان الوسيط عضو فى الكونجرس اسمه بارزينى … مستشار دون كورليونى وهم راجعين فى العربية وبيتناقشوا قاله انا كنت حاسس ان بارزينى هو اللى خلف مقتل ابنى قام المستشار قاله تقصد تاتاليا قال له لا بارزينى لان تاتاليا دة عرصPIMP ))  )) ميقدرش علينا لكن بارزينى هو المخطط الخفى … وعلشان كدة انا قلت للبلتاجى من يوم 2 يوليو فى التليفون كاثرين اشتون وان باترسون و هيجل هم اللاعبين الاساسيين فى الانقلاب وانا حذرتكم … وتاكيدا لكلامى وحتى احصل على جائزة افضل محلل سياسى فى مصر رسميا و عن جدارة فانا سوف ارفق 4 بوستات فيس بوك تاريخية حتى نفهم حقيقة تعيين اللواء محمود حجازى رئيس جديدا لاركان القوات المسلحة المصرية وصورة بتجمع حجازى و السيسى و كيرى بعد الانقلاب ب 3 شهور فقط  … خطأ مرسى التاريخى لم يكن فى تعيين عبد الفتاح السيسى وزيرا للدفاع ولكن خطأه التاريخى كان فى قبول تعيين اللواء محمود حجازى مديرا للمخابرات الحربية رغم تحذيراتى لهم لانى كنت عارف و الاخوان كمان كانوا عارفين انه نسيب السيسى ... ومن المعروف ان المخابرات الحربية مسيطرة على كل الاجهزة الامنية من فبراير 2011 ... و انا مؤمن ان محمود حجازى و صبحى صدقى اذكى و اشطر من السيسى و للعلم و للتاريخ السيسى دفعة 1977 رغم انه اكبر من صبحى بسنة لكنه تخرج بعده بدفعة و حجازى اقدمهم و اخطرهم لكن السيسى وضعه اقوى لان له ابن ظابط فى المخابرات الحربية و ابن ظابط فى الرقابة الادارية ... ارجعوا للتسريبات والتصريحات بعد تعيين حجازى وانه كان احد اهم مهندسين الانقلاب البارزين … وانا اعتقد ومؤمن ان قيادات الاخوان لازم تتحاكم بتهمة الغباء السياسى … وطالما باتكلم عن الانقلاب و الافلام واحمد زكى فعاوزكم تراجعوا فيلم السادات و ازاى الاستاذ هيكل نصح السادات بالاستعانة بالليثى ناصف للاطاحة بمراكز القوى وعاوزكم تراجعوا ازاى السادات اطاح بهيكل والليثى بعد كدة وهذا خير رد على كل اللى بيبرروا لاخطاء الاخوان وانهم لم يكن باستطاعتهم فعل شىء ... ومن اول توارد الاخبار عن لقاءات بين هيكل و السيسى فى 2013 قلتها وكنت اول واحد فى مصر يقولها ان السيسى بيستعد لانقلاب والتاريخ بيكرر نفسه ... بوستاتى موثقة بتاريخ النشر فى الفيس بوك وباكررها بتاريخ النشر وموثقة بنشرها كصور فى جوجل … ومش عاوز واحد خروف يطلع يعملى محلل سياسى و يقولى ما كلنا كنا عارفين  اللى انت بتحكيه فى مقالاتك وتحليلاتك مش جديدة ولا عبقرية يعنى … لان ردى عليه و بمنتهى البساطة … إن الفتنة إذا أقبلتْ عرفها كل عالم وإذا أدبرت عرفها كل جاهل ... لان بعد انتهاء الحرب و الفتنة وظهور الفخوخ و الخدع وتكشف كل الاسرار الكل هايعمل بيفهم وكان عارف بواطن الامور … وممكن اراجع معاكم تصريحات قيادات الاخوان و صفحاتهم قبل الانقلاب بايام ان الجيش انتشر فى البلد ليحمى الشرعية وانه سوف يسحق المعارضين اذا اعتدوا على المنشاءات والكلام العبيط اياه … 

الدكتور اكرم الشاعر … فى واحد بيسالنى ايه سبب تاخر نشر مقالاتى والتسريبات … وردى عليه هو … اولا فى حاجات لن انشرها ابدا لانها ممكن تخسر مصر مليارات وممكن تتسبب فى موت مئات المصريين خارج مصر لذا فهى امن قومى الى يوم مماتى … ثانيا انا سوف انشر بس الحاجات التى تخدم اسقاط الانقلاب و تخدم قضيتى الشخصية وانا منتظر لما يظهر اكرم الشاعر ويقفلوا باب الترشح للرئاسة … انا اتوقع ان اكرم الشاعر فى قبضة الامن السعودى او فى قبضة الامن المصرى الان … و لكنهم فى انتظار الفرصة المناسبة لاظهاره لان القابوطى بالفعل الانتربول رحله من اسبوع و هو فى سجن بورسعيد الان … السؤال الان لماذا تاخر الاعلان عن ترحيل اكرم الشاعر … ولا ننسى ان اكرم الشاعر كان لاعب رئيسى معايا فى عدة احداث لانه مثلا كان عارف منى باقتحام منظمات التمويل الاجنبى من قبلها بشهر … ولو اكرم الشاعر جاب سيرتى فى التحقيقات او طالب باخراج تسجيلات التليفون بيننا فانا اعتقد ان حاجات كتير هاتتغير … ولذلك هم بيظبطوا الامور الاول قبل اخراجه من الثلاجة … ونفس الكلام انا متوقعه بالنسبة لعبد الرحمن عز و المغير مؤخرا ... وانا تاكدت من قرب اصطياد اكرم الشاعر من فبراير الماضى … لان الاجهزة الامنية غيرت من اسلوبها مؤخرا و سلطت علية واحد معرفة لعرض خدماته وانا من اول يوم كنت عارف انه امنجى بس تركته من باب خلى عدوك اقرب اليك من حبيبك وعلشان اشترى منه واعرف خططهم … هم كانوا متعودين يبعتوا نسوان مدلعة وصحفيات و ناس امنجية شغالة فى البحث العلمى لاستدراجى … وطبعا كنت باكشفهم بعد عدة ايام … فعلى سبيل المثال ولاء جمال بتاعة صوت الامة ومدام شيماء بتاعة اليوم الثامن اللى قدمت نفسها انها باحثة فى معهد الليزر و هى فعلا باحثة فى معهد الليزر لكنها لم تخبرنى انها صحفية ومسئولة مهمة فى صحيفة اليوم الثامن الا بعد عدة اسابيع وبعد استدراجها فى الكلام … و الصحفية عبير بتاعة فيتو و غيرهم كثير و جميعهم هم اللى اتصلوا بى … و انا اللى كنت باستدرجهم حتى يخبرونى بما اريد ان اعرفه وكنت باصطادهم بسهولة من زلات لسانهم … وانا اتذكر ان ولاء جمال اتصلت بى فجاءة بعد اختفاء طويل و قعدت تقولى يوم احداث محمد محمود تعالى عاوزة اشوفك وانا فى المترو وكويس انك فى القاهرة علشان نتقابل واشوفك فرفضت وقلت لاصحابى واحنا قاعدين فى صينية الميدان انى اتوقع ان الميدان هايتفض فى خلال دقائق بسبب هذه المكالمة … ولما اصرت وطلبتنى مرة ثانية ذهبت لانتظارها خارج محطة المترو امام هارديز ورفضت النزول لمقابلتها تحت فى المحطة وبعد دقائق قوات الجيش والشرطة كانت بتطحن فينا وبيقتلوا الناس قدام عينى …

الشخص الذى سلطوه علية فى اول 2014 عرض يساعدنى على الخروج من مصر بعدة طرق خطيرة فتاكدت ساعتها انهم عاوزين يصطادونى ويقولوا قال مسكونى و انا باهرب او يخطفونى او يقتلونى وانا باخرج من البلد فطبعا صرفت نظر عن خروجى من مصر لان نفس المؤامرة اتعملت مع الشهيد سليمان خاطر لما اغروه بالهروب و انا محدش ماسك علية حاجة علشان اخاف واهرب وانا اساسا اللى ماسك عليهم حاجات واساسا انا كنت عاوز اخرج قرفا من العسكر و الاخوان … ثم بعد اسبوع عرض انه ممكن يكلم حد فى المخابرات يرجعوا لى فلوسى فى مقابل انى ارد الخدمة … فقلت له اى خدمة لمصر ماشى لكن انى اشتم الاخوان او اهاجم الشاعر لاااااا وساعتها تاكدت من قرب القبض على اكرم الشاعر لان اكرم كان خارج مصر ومالوش غلطة غير بلاغى … ثم نفس الشخص قال لى بعد عدة اسابيع انى لازم اسخن الامور واتصل تانى بسفارة قطر وتركيا علشان اسخن الامور بموضوعى واخلى الامور تتحرك ... فتاكدت ساعتها ان فى قضية مخابراتية تخص سفارة قطر او تركيا وعاوزين يدخلونى فيها … وبالفعل اعلنوا عن قضية بنت الاستاذ ايمن الصيرفى … الغرض الرئيسى من هذه الفقرة انى ابلغ الاجهزة الامنية انى استاااااذ كبير ومعلم ولو دماغ لدماغ لازم اطلع انا كسبان بحول الله وقوته رغم ضعف امكانياتى وانتم معاكم امكانيات مهولة … لكن انا معايا ربنا و هو كفاية والله حافظ ولن يضيعنى … العلاقة بينى وبين الانقلابيين ملخصها انهم منتظرين يحصل لى مصيبة بتدبيرهم او انى اغلط غلطة كبيرة يصطادونى من خلالها وانا شخصيا عارف كدة و قاعد على دكة الاحتياطى و منتظر فرصة للنزول للملعب رسميا قبل ان يتمكنوا منى ولذلك باتحرك بحذر و ببطء لانهم مش هايحلوا قضيتى ابدا ... 

الاستاذ هيثم ابو خليل … انا اتصلت بالاستاذ هيثم خليل من شهور بصفته صاحب مركز حقوقى حتى يتدخل فى قضيتى … ثم قال لى انه اعطاها لمركز محاماة مرموق و انهم بيتابعوا القضية … لكنى لاحظت كل مااطلبه انه بيمجد فى شخصى بشكل مبالغ فيه وانا رجل محترف طبعا فلازم اشك كدة … يعنى يقعد يقولى لا تقلق وانت رمز من رموز مصر وقضيتك تاريخية و حاجات من هذا القبيل … فقلت له بعد شهر لما زهقت يا ريت تصدر موضوعى للاعلام بدل الانتظار لحسم قضائى … فاختفى فجاءة والله من تانى يوم رغم ان هو اللى كان بيقولى تطلبنى فى اى وقت وهنتقابل قريب و هكذا … فقلت لصديقى تصرف هيثم بالشكل دة مالوش غير معنين يا اما الرجل بينسق مع قيادات اخوانية يا بينسق مع المخابرات … ثم وجدته من حوالى اسبوع هرب الى تركيا فقال لى صديقى انت عبقرى فقلت له العادى بتاعى … لان هروب هيثم خليل لتركيا معناه ان قيادات الاخوان اللى امروه ان لا يصدر موضوعى للاعلام وهذا نسبته 50 % او ان الاجهزة الامنية هى اللى امرته بعدم تصدير موضوعى و ان هم اللى هربوه لتركيا لاختراق مجموعات الاخوان هناك … لكن فى الحالتين انا تحليلى كان عبقرى يا اما هيثم مع قيادات الاخوان يا اما هيثم مع قيادات المخابرات …

الدكتور باسم خفاجى و الشيخ حازم صلاح ابو اسماعيل وانتخابات الرئاسة … الاستاذ باسم خفاجى بورسعيدى مثلى ولقد تحدثنا عدة مرات على الرسائل فى الفيس بوك فى 2013 من قبل الانقلاب بشهور و هو دارس مقالاتى و مدونتى كويس وعلى اتفاق ان نتقابل يوما ما عندما يزور بورسعيد … وانا اعتقد ان الفيديو الذى نشره حول انتخابات الرئاسة وعن عدم ترشحه للرئاسة الان كان خطوة عبقرية … ولقد قام الاستاذ حازم ابو اسماعيل بخطوة مشابهة من محبسه لكنى اراها انها كانت خطوة غير موفقة بالمرة لاختلاف طريقة العرض وظروف ابو اسماعيل … وبالمناسبة باسم و ابو اسماعيل من اشطر و من اخلص من انجبت مصر فى تاريخها من وجهة نظرى الشخصية لكن الفرق بين باسم و ابو اسماعيل ان باسم خفاجى مثلى فى انه اعتاد ان يهاجم الاخوان علنا لاصلاحهم و انقاذهم وانقاذ الثورة و لذلك لم يحقق شعبية كافية وهذه ضريبة كان لازم ندفعها انا و هو … ابو اسماعيل كان بيهاجم الاخوان على استحياء بحكم انه اخوانى سابق وقدم استقالته وباعتراف قيادات الاخوان … وهذه هى اهم اخطاء حازم ابو اسماعيل رغم تحذيراتى المباشرة له فى لقاء جمعنى معه فى بورسعيد وفى مكالمة تليفون مع زوجته لنصف ساعة وهى كانت عارفانى ومقالاتى ارسلتها له مع ابنه … مشكلة ابو اسماعيل انه لم يعترف بانتماءه للاخوان ومشكلته الكبرى هو عدم هجومه الكافى على تصرفات الاخوان بدعوى ان هذا سوف يضر الاسلام ويقوى اعداء الاخوان عليهم و هى حجة كان نتيجتها السجن له وللاخوان ايضا وموت الثورة اكلينيكيا حتى الان …

الاستاذ يوسف باشا ندا … انا اعتقد ان حوار الاستاذ يوسف المليونير الاخوانى الشهير هو اسوا حوار شاهدته من بعد الانقلاب لاى شخص داعم لعودة مرسى واساسا هو السبب لكتابتى لهذه المقالة لانى كنت ناوى اكتب بعد غلق باب الترشيح للرئاسة … ملخص الحوار ان ندا عاوز يقول انا مش اخوان يا جماعة ... فقد كان حوار التناقضات و عدم الاعتراف بالخطا و حوار التبرير الاخوانى المعهود … ودلالة واضحة ان لو هذا هو تفكير الاخوان الحالى و هو نفس تفكير الاخوان سابقا فانا اقولها علنا و صراحا … ابقوا قابلونى لو الانقلاب سقط كما قلتها لكم من شهور … حسنى مبارك … عمر سليمان … حسين طنطاوى … مهدى عاكف  …محمد بديع … محمود عزت … و اخرهم يوسف ندا … جميعهم فوق السبعين ومكانهم الطبيعى كان المفروض يكون خارج الملعب ويقدموا نصائح فقط من بعيد ويتفرغوا لعلاج امراض شيخوختهم … ولقد توقعت سقوطهم جميعا مبكرا ومن اول انتفاضة 25 يناير بسبب حكم السن … و اصرارهم على الاستمرار فى المشهد والعند كان نتيجته الهزيمة التاريخية والسقوط المدوى لان السن له حكمه  …لكن الاستاذ يوسف ندا لاعيب حذر وحاصل على الجنسية الايطالية وله علاقات دولية قوية لذلك فهو خارج القصف مؤقتا حتى الان وايضا بسبب مشاكله الاخيرة مع الشاطر … ونفس الكلام فى المملكة العربية السعودية بخصوص الامير بندر و الامير مقرن لتجاوزهم سن السبعين و الايام بيننا ... الاستاذ ندا بيقول ان الاخوان لم يغلطوا فى 1954 او فى 2013 رغم انه فى بداية الحوار قال ان الاخوان لم يتعلموا من التاريخ … ثم يناقض نفسه ثانيا ويكرر تصريح وزير الاعلام الاخوانى السابق ونقيب الصحفيين سابقا الاستاذ صلاح عبد المقصود عندما حاصره مذيع الجزيرة مباشر الرائع احمد طه وقال له انه كان ضعيف مع وزارة الاعلام فرد عليه ان التلفزيون فيه 90 % فلول وهى دى القماشة وهذا كان كل اللى اقدر عليه … وندا كرر نفس الكلام وقال لمذيع الجزيرة الاستاذ احمد منصور عندما ساله لماذا لم يغير مرسى قيادات الجيش وان مرسى هو اللى جعل الشرطة تزداد فى اجرامها فرد ندا عليه ان الجيش دة هو هو من الخمسينات وكلهم فاسدين وان الحكم ممارسة وليس علم وان اعوان مبارك وتلاميذه هم بس اللى كانوا مدربين على الحكم وان مرسى كان معذور وبعدين يناقض نفسه مجددا ويقول قيادات الجيش الكبرى فقط هى اللى فاسدة … وبالمناسبة الاستاذ احمد منصور كان اكثر من رائع فى هذا اللقاء  …وبعدين حاصره منصور مجددا عن كره قطاع كبير من الشعب للاخوان الان فعاد ندا ليناقض نفسه ثالثا ويقول اللى نزل ضد مرسى او اللى بيكره الاخوان هم 7 مليون مسيحى وان فى مصر 20 مليون عاطل و 30 مليون امى لا يجيد القراءة و الكتابة وسهل يضحك عليه … وبالمناسبة هو دة نفس كلام الحزب الوطنى سابقا عن حقيقة شعبية الاخوان والجهل و الزيت و السكر ... ثم يناقض نفسه رابعا ويقول ان الاخوان فشلوا لانهم اصلاحيين وميعرفوش يتعاملوا مع دمويين و فاسدين … وردى على الاستاذ يوسف ندا هو هى دى مصر بحلوها و مرها و هو دة شعبها ومش هانستوردلك شعب على مقاس الاخوان ولا على مقاس امكانياتكم لانكم لو مش قادرين او مش عارفين ابعاد الملعب و طبيعة اللاعبين المفروض ان محدش كان يتقدم  للحكم من اساسه كما طالبناكم من بدرى …

وكما قلت للشاطر سابقا فى مقالاتى وبوستاتى ان مصر مش ملككم علشان تروحوا تعملوا صفقات مع الجيش و تضيعونا والتى اكدها بعد عامين كاملين التسجيل الذى تم تسريبه لحوار مشعل و الشاطر مؤخرا … فاقولها للاستاذ يوسف ندا ان اصلاح مصر لن ياتى الا من داخلها وبشبابها ومن جميع قطاعات وطوائف الشعب بما فيهم السلفيين و الاخوان و المسيحيين والليبراليين  …وليس من فيلا فى ايطاليا او باتفاقات وصفقات مع اوروبا او امريكا او بدعم ايرانى خفى … الاخوان هم سبب اللى حصل فى مصر فى 1954 و 2013 ونقطة ومن اول السطر … الحسم مطلوب فى كل شىء فى حياتك وفى حاجات تتغفر و حاجات لا و فى اخطاء غير مسموح بعملها فضلا عن تكرارها … انا بقى عاوز الاخوان يراجعوا تصريحات العريان واخطاءه المرعبة لشهور و تصريحات و تصرفات مكتب الارشاد و علاقته بالرئاسة و عاوزهم يراجعوا تصريحات وزير الداخلية الذى رفض عودة الظباط الملتحين و تصريحات رئيس الاركان انذاك فى الامارات  وتصريحات وزير الدفاع لشهور و تصريحات بعض ظباط الشرطة والاعلاميين و بعض القضاة وووو وبعدين حد يقولى ما هى القرارات الحاسمة و الفورية اللى مرسى اخدها ردا على هذه التصريحات و التصرفات … وعلشان ارد على الاستاذ ندا رد اخير و باعترافاتهم لما بيقول ان المظاهرات كفيلة باسقاط الانقلاب … هااقوله كلام القيادى الاخوانى الاستاذ جمال حشمت لما سالوه على الجزيرة مباشر ليه اللى حصل فى 3 يوليو كان انقلاب قالهم لان الملايين اللى كانوا فى الشارع ساعتها لو قعدوا شهور لم يكن ليتغير اى شىء لولا تدخل الجيش … و يارب كلامى يتفهم صح و بدرى حتى لا نضحى بالشباب دون داعى ... انا مع السلمية الايجابية لكن المظاهرات وحدها كافية لاسقاط الدولة ومئات القتلى والوف المعتقلين لكنها لن تسقط الانقلاب كما يدعى الاستاذ ندا … التاريخ لم ولن يرحم المغفلين سواء فى 1954 او فى 2013 … ومصر ابقى و اهم من الحفاظ على كيان تنظيم الاخوان المسلمين ...

اوكرانيا و ليبيا و ايران ... انا اعتقد ان اجواء الحرب الباردة عادت رسميا الى العالم فى 2014 وهذا شىء سار جدا ... وانا اعتقد ان اوكرانيا او ايران او ليبيا ممكن تكون اى دولة منهم هى الشرارة الاولى لحرب عالمية ثالثة فى الشهور و السنوات القادمة ... وانا اتوقع ان حاجات كتير هاتحصل فى ليبيا قريبا لان ما يحدث فى ليبيا او ما يتم التمهيد له غاية فى الخطورة على كافة المستويات ... رد بوتين كان رائع و سريع وحاسم على مخططات امريكا و الاتحاد الاوروبى ... ومن الاخر قالهم اياكم تكونوا مفكرينى مثل قادة الدول العربية ... و نفس الكلام قاله لهم السيد الرئيس اردوغان عمليا لما قالهم اياكم تكونوا مفكرينى مرسى ... لكن انا ذكرت موضوع اوكرانيا الان كمقدمة لمقالة طويلة فى المستقبل حتى نفهم احداث اسوان ونفهم تحركات تاوضروس وساويرس مع سفارة امريكا و مخطط تقسيم مصر الى سيناء و نوبة و مسيحيين و مسلمين ... و اوكرانيا شاهد حى على تلك الاطروحة ... ورغم ان بوتين عارض الاطاحة برئيس اوكرانيا لكنه ايد الاطاحة بمرسى ورغم ان امريكا ايدت الانتخابات فى مصر بعد الانقلاب لكنها رفضت الاعتراف باستفتاء القرم ... وتصرفات اوباما و بوتين والاتحاد الاوروبى وهذه التناقضات الفجة ممكن نلخصها فى ما يسمى الدعارة السياسية فى النظام الدولى الجديد ... وانا اتوقع ان هايكون هناك حادث جلل و تاريخى اما فى مصر او فى العالم فى خلال شهر من النهاردة لان سقوط الانقلاب العسكرى فى مصر لن يكون الا بانفجار خارجى او داخلى بكل ما تحمل كلمة انفجار من معنى ... وختاما لهذه المقالة فانا سوف اضع لينك للالبومات السبعة التى تحدثت عنها سابقا كثيرا ... وهذه الالبومات السبعة عبارة عن 365 صفحة وسوف تكون النواة الاساسية بمشيئة الله تعالى لاول كتاب اقوم بكتابته و نشره فى حياتى ... ولا حول ولا قوة الا بالله و افوض امرى الى الله ...