لقد قدمت من اسبوع على جواز سفر جديد عشان الاجهزة الامنية رفضت حتى الان انها ترجع لي جواز السفر الذى تم سحبه منى فى مطار القاهرة من 4 شهور دون اى سند قانوني .. وايضا الخارجية و المخابرات رفضوا يرجعوا لي ابحاثي ورسومات المشروع العلمي الذى قدمته لهم فى تركيا .. ورغم انه شغلي وتعبي وافكاري و مشروعى انا وحقى فلم يعطوه لى رغم انهم بالفعل نفذوا 40 % من هذا المشروع حتى الان ... مما اضطرني للعمل عليه وتجميعه وطباعته من اول وجديد من شهر بعد ان اشتريت كمبيوتر و طابعة لاني تخلصت من اللاب توب الخاص بي قبل رجوعي لمصر بعدة ايام خوفا من مصادرته منى فى مطار استانبول فى تركيا .. بعد ذهابي لادارة الجوازات من اسبوع قالوا لازم نعمل نشرة بالجواز ونخطر جميع الاجهزة فى الدولة عشان نعرف الجواز فين .. قلت لهم تمام اخطروا الدنيا كلها ومفيش اى حاجة ضدى اساسا .. وبالفعل قمت بتقديم طلب نشرة اخطار فقد جواز السفر يوم 1 مارس 2020 وتم الموافقة عليه من الظابط المختص .. ذهبت بالامس استعلم بعد مرور اسبوع كما طلبوا مني .. قالوا تمام مفيش مشكلة تخصك ووصلنا الرد ... لكن وانا باسلمهم اوراق التقديم على الجواز الجديد قالوا انت لازم تروح السجلات العسكرية فى محافظة الزقازيق تجيب شهادة جيش جديدة او روح هات الجواز القديم ودى مشكلتك معاهم .. فقلت له اساسا انا اعفاء من الجيش والشهادة اللى معايا بتقول انى معايا اعفاء من الجيش اساسا والباسبور القديم بيقول انى غير مطلوب اساسا واعفاء نهائي وكان عليه ختم بذلك ... واكيد كل شيء عندكم فى السجلات الخاصة بالجوازات لان الظابط اخرج بياناتي الخاصة بجواز السفر امامي من على شاشة الكمبيوتر يوم تقديم الطلب ... ولم اصل معاهم الي اى حل طبعا كما هو متوقع .. الغريب فى الموضوع انى عاوز اروح اقدم على الجنسية السعودية وقلت للاجهزة الامنية ذلك او على الاقل اعرض عليهم الابحاث والمشروع والمملكة العربية السعودية دولة حليفة ومهمة لمصر فلماذا كل هذا ... واساسا انتم من اخذ مشروعي ورفضتم اعطائي اي فلوس بل انكم رفضتم اعطائى مشروعى نفسه ... ولانكم اساسا ممكن تمنعونى من السفر لاى دولة اخري من المطار لكن انا محتاج جواز السفر حتى استطيع الذهاب للسفارة السعودية والتقديم على الجنسية وعرض مشروعي ... الى جانب اني لا اعرف فعليا اين جواز سفري حاليا اذا كان فى المخابرات العامة المصرية او فى جهاز الامن الوطنى ... لانه عند احتجازى فى مطار القاهرة تم سحب الجواز من خلال ظابط شرطة .. ورفضت التحدث لاى ظابط وطلبت احضار ظابط من المخابرات العامة المصرية او ان يتم ارسالي لهم بعربية من المطار .. فجاء احد الظباط بعد ساعتين وقال انا من المخابرات العامة المصرية واخذ كل الاوراق اللي كانت معايا وجلسنا و تحدثنا وشرحت له كل شيء فقال لي فى خلال ساعات هانحدد هاتخرج من المطار ام لا ... ولا تقلق كل هذه الاجراءات لحمايتك وتامينك .. ثم جاء ظابط اخر لاستجوابي مرة اخري بعد كذا ساعة ... وبصراحة كانوا محترمين جدا وراقيين جدا فى تعاملهم معايا فى المطار .. لكن وهم بيخرجونى من المطار بعد 18 ساعة قالوا لي لا تذهب للمخابرات العامة مرة ثانية واذهب للامن الوطنى للاستعلام عن جواز سفرك .. وطبعا كل شبر فى مطار القاهرة فيه كاميرا ... لكن فى اخر مرة من شهرين وانا فى الامن الوطنى بناء على طلبهم للمرة الثانية الظابط اخبرني فى اخر الجلسة انهم منتظرين تليفون من القاهرة بخصوص جواز سفري ... ولذلك انا استنتجت ان الموضوع اصبح خارج نطاق الامن الوطنى لان هذا الظابط كان طيب و راقي جدا فى تعامله معايا فى المرات التى جلسنا فيها سويا وعشان كدة انا مصدقه ... الدولة بتقول اللى عاوز يعارض يعارض من داخل مصر ومصر دولة حرة ومفيش فيها ظلم و دولة قانون ... الدولة بتقول احنا بنقف جنب الشباب وبنعمل مؤتمرات للشباب وبندعم الشباب للقيادة .. الدولة بتقول بتشجع العلماء وبتدعم المشاريع والعلماء والمبدعين .. طيب يا تري ايه اللى بيحصل معايا من 4 شهور منذ عودتي لمصر ... اللهم اني اعوذ بك من غلبة الدين وقهر الرجال ... حسبي الله ونعم الوكيل وافوض امري الي الله ان الله بصير بالعباد ..
